قصائد قيلت في السيارات

الدوج يسب الجمسي=يقول ان شغلتة تكسي
وانة يقطم العكسي=وخلق اللة يعرفونة
وجاك الفرد مغتاظي=وقال الهرج ذا فاضي
عسا من ينكر الماضي=مع السكراب يرمونة
انا سيارت اسعافي=وكم شليت من حافي
وكم حججت الاشرافي =لبيت اللة يزورونة
وقال الدوج انا الوافي=وانا الي رفرفي ظافي
وانا من الرمل ماخافي=وانا لي دبل كارونة
وجاك الجمس وشهودة=على الكبوت مرصودة
حروف تطير النودة =من الي ما يعرفونة
وقال الجمس انا الفلة=وانا الي زينو دلة
غرظ من يشتهي خلة =لا ذكر مظنونة

وقال عايش الداموك

يالفرت روح ترا الديره خلاويه= روح ترا رماة الشهبان جيناها
ممشاك بثنين مالك فيه ماويـه=ياقرد خظك ليامنـا وصلناهـا
والله لاخلي صياحك حس جنيه= جنية قام بن جلعـود يقراهـا
نبي ربوعٍ ورى حائل وجلديه=يم الغزاله شمالاً مـن قراياهـا

الشاعر محمد البحيح الشماسي نظم هذه القصيدة (محاوره بين سيارتين) في أيام شبابه وكانت أفضل سيارتين المور ( المرسيدس الشاحنه ) والفرت

ألايا فكرتي كيف القضاء والحكم بين أثنين=لقيت المور وياالفرت يطـلب حكم شرعـيه
يقول الفرت أنا الطيب مكمل واجـب الطيبين=سريع في الطلب تشهد لي أفراد السعوديه
تفرج شوف طبلوني ميه مـن فوقها الستين=سريع في الطلب مانيب سيارة دويينه
وقال المورأنااللي سرعتي تمشي على التقنين=وشيل الحمل لاعجزت عنه صنع المريكيه
أنا من صنعة ألماني شف الطمغه على الشاصين=شهودي قيمتي مع قوتي ميه على ميه
وقال الفرت أنا قبل المزفلت وأنت وينك وين=تغرز في دروبي ما تعدي خطوط رسميه
ليا من رحت مع دربي يثور عندك التدخين=تغرز لو كفاراتك بعد يالمور رمليه
وقال المور أنا ديزل ولاني بلذع بليتين=مقرر صرفتي يومين تصرفها انت يومـيه
كليت أهلـك بتبديـل الغيـار وشربكالبنزين=خساره لو تنزل قيمتك يالفرت ربيه
وقال الفرت أنا لاجيت صحراء رحت عنك يمين=أسافر مع نفودأخريص منقل منه هميه
أسافر مع نفود السر كل شافني بالعين=بطل مانيب مثلـك مـا تعـدى خـط ردميه
وقال المور أنا أشيلك وأشيل من الفروت أثنين=ثلاثه مـن الفروت بحملها ما حمل ليه
لكن أصحى تجاكرني وأنا مانيب لك سنين=تسمح خلها ما بيننا دعوى سموحـيه

محمد عبيد الديحاني- رياض الخبراء

راح وقت الفرت يلي تركبونه=وراح دوره فالسنين الماضياتي
يوم ذربين اليماني يمجنونه=مع خطوط في صحار كاحلاتي
وصار بعد العز مفقوعه عيونه=طايح تسفي عليه السافياتي

وكان بن ودمان اسود البشره مما دعى البعض من المهربين ان ينعتوه بالعبد وغيرها من الصفات في تلك المساجلات بينهم

بداء ابن ودمان تلك المساجلات بينه وبين بعض المهربين حين كتب قصيده فيها تحذير للمهر بين بقدومه وتحدي لهم وكانت سيارات سلاح الحود من نوع العنتر ناش كما يتضح من التهديد للهافات اللتي يستعملها المهربين

يقول بن ودمان

ياهل الهافات عنتر ناش جاكم =وا عنا من صادفه بأرضن خليـّه
لعنبوكم هونوا جاكم عناكم= جاكم الموت الحمر ماهي زريـّه
هفوة ٍ زلـّت لكم وإكلوا خراكم=بيعوا الهافات بأقيام ٍ رديـّه
وإعلموا وإدروا ترانا في قفاكم =ومن يقاوي له جبل ما راح نيـّه
ياهل الهافات عابينا عباكم =الفروت جداد والعزبه قويـّه
ياهل الهافات خيـّبنا رجاكم = نحمد اللي قدرته ماهي خفيـّه
بيعوا الهافات ردوا في سراكم = خلـّوا السمره وطـّوال الحنيـّه
الدهر ذعذع لكم ثمن جفاكم = وإفهموا وإدروا ترى في الجحر حيـّه
خسرت الشركة وخيـّبنا ثناكم = وبعضكم بالقسط ما خلـّص وديـّه
ياهل الهافات حنا من وراكم = والسعد قدامنا في كل هيـّه
تحت حكم اللي عن المنكر نهاكم =عن طريق الدين تلقون المنيـّه
عندنا اللي يمرجن باقي شواكم =خمسه وستين ضد الجندليـّه
والذي هيـّض غرامي من خطاكم =هرجة ٍ من واحد ٍ جتني خطيـّه

وعندما تسربت تلك القصيده ووصلت لسمع المهربين رد عليه احدهم ويدعى فهد الكحيلي ناقضا قصيدة بن ودمان ورادا الصاع صاعين

ياهل الأبرق تبـّين لي خطاكم =والخطا راعيه يقنع بالخطيـّه
يا عوينك وارد الستـّه لفاكم =وعنترك خربان والخمسه رديـّه
كم ونيت ٍ لا كمل حمله وطاكم= وقاعد ٍ بأرقابهن تثني الهديـّه
وإن لحقتم موتره عنده دواكم =أرنب ٍ حمرا عيون مجادعيـّه
من قديم وسلمها تاكل خصاكم=فعلها في جدكم لا رحم حيـّه
إن بغيت الصلح جاكم ما كفاكم = وإن بغيت الزود رد العلم ليـّه

بعد مده من الزمن قبض على مهرب ومعه هاف جديد لم يتعدى طبلونه الالف وخمس وكان هذا المهرب ولد عم لفهد الكحيلي فقال بن ودمان ساخرا من الكحيلي ومن سياراته اللتي تحدى بها سيارات سلاح الحدود من قبل حتى وان كانت سياره جديده وعلى نفس قافية القصيد الاول

يا سلاح الحد يوم الله عطاكم = لا تهابون الخطر والمخطريـّه
خلوا الرشاش مركوز ٍ حداكم = والمخازن وسطها النار الصليـّه
يالكحيلي وارد الخمسه خذاكم =وستـّتك مع حملته ما راح نيـّه
ربعنا صادوه عانه من وراكم =ما مشى ياكود ألف وخمسميـّه
والعناتر يالكحيلي في حراكم =والفروت الحمر وجنود السريـّه
يالكحيلي ما مشينا في رضاكم = إن زعلتوا أو رضيتوا بالسويـّه
ياهل الهافات ما خذتوا قضاكم =ما بكم قاصر ولكن معجزيـّه
والكحيلي في قصيده ما كفاكم =دوروا غيره ترى الدنيا هبيـّه
ياهل الهافات تالي منتهاكم = والله إنه عند سلك العسكريـّه
مثل ٍ ناس قد وطاهم ما وطاكم = فعلهم كنـّه عملكم بالسويـّه
أو نسفـّركم ونسلم من غثاكم = والحكومه دونكم والله غنيـّه
إن مشيتوا بالسنع محد ٍ شناكم = ما يجازى واحد ٍ ماله قضيـّه
وإن عصيتوا الأمر معروف ٍ جزاكم=بأمر شيخ ٍ ما يبى راعي الخطيـّه
والحكومه رتبـّتنا في نحاكم = نمنع المنكر عن أفراد الرعيـّه

اتمنى ان يكون اختياري جيد لكم